बनावट कागदपत्रे सादर करून न्यायालयाची दिशाभूल करणाऱ्या चौघाविरूध्द गुन्हा दाखल

औरंंगाबाद/प्रतिनिधी
बनावट कागदपत्रे सादर करून न्यायालयाची फसवणूक करणार्‍या टोळीचा मुसक्या गेल्या आठवड्यात गुन्हे शाखा पोलिसांनी आवळल्या. या टोळीला अटक केल्यानंतर न्यायालयात एकच खळबळ उडाली असून या टोळीने केलेले गुन्हे आता एका मागून एक उघडकीस येत आहेत. पोलिसांच्या ताब्यात असलेलया टोळीने आतापर्यंत किती गुन्हे राज्यात केले याची माहिती पोलिस घेत आहेत.
पोलिसांनी दिलेल्या माहितीनुसार, विनोद उर्फ सोनु लक्ष्मण कांबळे, प्रियंका राजू कांबळे (दोघे रा. इंदिरानगर) कचरु जयराम खिल्लारे व जयकर गडवे (दोघे रा. गल्ली नं. २, रमानगर) यांनी न्यायालयात बनावट आधारकार्ड, पॅनकार्ड, मतदान ओळखपत्र, एैपत प्रमाणपत्र (सॉलव्हन्सी) आदी कागदपत्रे  न्यायालयात ७ एप्रिल २०१७ ते २६ ऑक्टोबर २०१८ या काळात सादर केली होती. तसेच सादर केलेली सर्व कागदपत्रे खरी असल्याचे न्यायालयास भासवून न्यायालयाची दिशाभुल केली होती. दरम्यान, विनोद उर्फ सोनू कांबळे, प्रियंका कांबळे, कचरू खिल्लारे, जयकर गढवे यांनी न्यायालयात सादर केलेली कागदपत्रे बनावट असल्याचे न्यायालयाच्या निदर्शनास आले.
याप्रकरणी शिवकुमार हिरालाल कावळे (वय ४१, रा.गवळीपुरा, छावणी) यांनी दिलेल्या तक्रारीवरून न्यायालयाची फसवणूक करणार्‍या चौघाविरूध्द वेदांतननगर पोलिस ठाण्यात गुन्हा दाखल करण्यात आला आहे. पुढील तपास उपनिरीक्षक भदरगे करीत आहेत.