जागतिक  मधुमेह दिनानिमित्त उद्या
'उडान' तर्फे मधुमेही बालकांची पदयात्रा

औरंगाबाद दि. १२ - बाल मधुमेहींसाठी कार्यरत 'उडान' या स्वयंसेवी संस्थेच्या वतीने गुरुवार, दि. १४ नोव्हेंबर रोजी बाल मधुमेही आणि त्यांच्या पालकांचा सहभाग असलेल्या पदयात्रेचे आयोजन करण्यात आलेले आहे. यामध्ये बाल मधुमेहींसह संपूर्ण उडान परिवार सहभागी होणार आहे.
इंटरनॅशनल डायबेटिक फेडरेशन या संयुक्त राष्ट्राच्या मधुमेहाशी संबंधित संघटनेच्या वतीने जगभरातील १७६ देशांमध्ये जगतिक मधुमेह दिनानिमित्त या आजारासंबंधी जागरूकता निर्माण करण्यासाठी हा उपक्रम होत आहे. त्याअंतर्गत औरंगाबादमध्ये या पदयात्रेचे आयोजन करण्यात आले आहे. जागतिक संघटनेच्या वतीने दरवर्षी या संदर्भात एक घोषवाक्य जाहीर केले जाते आणि यंदाचे घोषवाक्य हे 'मधुमेह आणि परिवार' असे आहे.
या पदयात्रेत लहान मुले, त्यांचे पालक सहभागी होतील. यात ढोल-ताशा यांच्या बरोबरच बाल मधुमेही मुले-मुली लेझीम खेळणार आहेत. बाल मधुमेहींसाठी, त्यांच्या उपचारासाठी शासनाने पुढाकार घ्यावा असे आवाहन करणारे 'मला वाचवा' असे फलक मुलांच्या हातात असतील.
जालना रोडवरील आकाशवाणी चौक येथून सकाळी सव्वासात वाजता या पदयात्रेला प्रारंभ होईल. ही पदयात्रा मोंढा नाका मार्गे क्रांती चौक आणि परत आकाशवाणी अशी असेल. आकाशवाणी चौकात पदयात्रेचा समारोप होईल.
डॉ. अर्चना आणि डॉ. संपत सारडा यांच्या संकल्पनेतून १८ वर्षांपूर्वी साकारलेल्या ;उडान'च्या रोपट्याचा आज वटवृक्ष झाला आहे. या माध्यमातून सातशेवर  टाईप वन मधुमेही मुलांवर मोफत उपचार केले जातात, त्यांना स्वावलंबी जीवन जगायला शिकविले जाते, त्यांनी, त्यांच्या कुटुंबीयांनी आणि समाजानेही त्यांना मधुमेहासह स्वीकारावे, ते सर्वसामान्य मुलांप्रमाणेच आहेत हे दर्शविण्याकरिता  'उडान' सातत्याने विविध उपक्रमआयोजित करत असते. मधुमेही बालकांच्या पालकांनाही त्यासाठी विशेष प्रशिक्षण दिले जाते. अनेक समाजोपयोगी उपक्रम या मुलांच्या माध्यमातून राबवून त्यांना समाजाच्या मुख्य प्रवाहात सहजपणे सामावून घेतले जावे, यासाठी विशेष प्रयत्न केले जातात तसेच यामुळे या मुलांचा आत्मविश्वास यामुळे वाढतो आणि ते यशस्वी जीवन जगण्यासाठी सज्ज होतात. अशी अनेक मुले आज समाजामध्ये कार्यरत आहेत.