शिवसेनेला मिळणार पालिकेतील सत्तेत वाटा!

भाजप आणि शिवसेना यांच्यात युती झाल्याने आता पुणे महापालिकेत सेनेला सत्तेचा वाटा मिळणार आहे. तशी मागणीच शिवसेनेने सत्ताधारी भाजपकडे केली असून, उपमहापौरपदासह एक वर्षासाठी स्थायी समिती अध्यक्षपद आणि काही विषय समित्यांच्या अध्यक्ष- उपाध्यक्षपदांची मागणीही केली आहे. 

दोन वर्षांपूर्वी झालेल्या महापालिका निवडणुकीत भाजप व सेना हे दोन्ही पक्ष वेगवेगळे निवडणूक लढले. त्यात भाजपने पालिकेत एकहाती सत्ता मिळविली, तर सेनेचे केवळ दहा नगरसेवक निवडून आले. त्यामुळे सेनेला विरोधी पक्षाच्या बाकावर बसावे लागले होते. आता मात्र निवडणुकीसाठी युती झाल्याने दोन्ही पक्ष एकत्र आले आहेत. स्थायी समिती अध्यक्षपदासाठी भाजपचा अर्ज भरण्यासाठी सेनेने हजेरी लावली होती. आता यापुढे जाऊन सेनेला थेट सत्तेत वाटा हवा आहे.
शिवसेनेचे गटनेते संजय भोसले यांनी याबाबत महापौर मुक्ता टिळक यांना पत्र दिले आहे. त्यात पुढील अडीच वर्षांसाठी उपमहापौरपद, एक वर्षासाठी स्थायी समितीचे अध्यक्षपद, चार विषय समित्यांपैकी प्रत्येक वर्षी दोन समित्यांचे अध्यक्ष व उपाध्यक्षपद आणि एका प्रभाग समितीचे अध्यक्षपद अशा विविध पदांची मागणी केली आहे. आता नक्की कोणती पदे सेनेला मिळणार यासंबंधीचा निर्णय पालकमंत्री गिरीश बापट आणि सेनेचे संपर्क नेते, खा. संजय राऊत आणि संपर्कप्रमुख बाळा कदम हे लवकरच एकत्र बैठक घेऊन घेणार आहेत.
दरम्यान, भाजपनेही सेनेला सत्तेत वाटा देण्याची तयारी दर्शविली असून, उपमहापौरपद आणि काही विषय समित्यांची अध्यक्षपदे सेनेला सोडली जातील, असे भाजपमधील सूत्रांकडून सांगण्यात आले.